Posted in Gulmi News

खेलमैदान निर्माणमा सहयोग गर्न चौतर्फी आग्रह

खेलकुद मार्फत जिल्लाका युवाहरुलाई सृजनशील र अनुशासित बनाउदै यहाँको चौतर्फी विकासमा लगाउन गुल्मी क्षेत्र नम्बर १ अन्तर्गत सत्यवती गाउँपालिका वडा नम्बर ६ खल्लुकरुखमा रहेको सार्वजनिक जग्गामा जिल्लास्तरीय खेदकुद प्रतियोगिताहरु संचालन गर्न सकिने खालको खेलमैदान बनाउने उद्देश्यसहित यहाँका युवाहरु पुन: जुटेका छन् । जिल्ला कै उत्कृष्ट मैदान बनाउने भन्दै विगतमा काम सुरु भएको भएतापनि बजेट अभावका कारण उक्त कार्य पूरा हुनसकेको थिएन । जिल्लाको क्षेत्र नम्बर १ मा यस्ता सार्बजनिक खेल मैदानको अभाव महशुस भएरै स्थानीय निकायको निर्वाचनका बेला पार्टीको घोषणा पत्रमा समेत समेटिएको भएतापनि आवश्यक ऐनकानुनको अभावमा स्थानीय निकायले गति लिन नसकिरहेकै अवस्थामा निर्वाचित प्रतिनिधिलाई यसप्रति ध्यानाकर्षण गराउने उद्देश्यसहित फेरी निर्माणको काम थालिएको हो ।

gulmikhel1

सुरुमा स्थानीय सहयोग जुटाएर काम सुरु गर्ने, आर्थिक पारदर्शिता सहित सहयोगी दाताहरुको नाम खेलमैदानको उत्तरपट्टि सडक छेउमा बोर्ड बनाएर राखिने खेलमैदान निर्माणका सक्रिय कार्यकर्ता शुशिल क्षेत्रीले जानकारी दिनुभयो । जिल्ला कै सबैभन्दा व्यस्त सडक रिडी-रुद्रबेनी-वामीटक्सार सडकखण्डमा पर्ने र उक्त सडकको विस्तार तथा कालोपत्रे गर्ने काम धमाधम भैरहेकोले पनि यसको उपयोगिता खेलकुदका मात्र सिमित नभई सार्वजनिक कार्यक्रम संचालन गर्न पनि अत्यन्त उपयोगी हुने स्थानीयवासीहरुको ठम्याई छ । जिल्ला कै लगभग केन्द्रमा पर्ने उक्त ठाउँ जिल्लालाई काटेर बग्ने बडीघाट नदीको किनारमा अति रमणीय ठाउँमा पर्दछ ।

gulmikhel

जिल्लामा हुने खेलकुद प्रतियोगिताबाट उत्कृष्ट खेलप्रतिभाहरु निस्कने गरेको भएतापनि उपयुक्त खेलमैदानको अभावमा यहाँका प्रतिभाहरु भित्रभित्रै हराउने गरेका छन् । विगत वर्ष राखिएको जिल्लास्तरीय क्रिकेट प्रतियोगिताबाट ‘देशलाई आवश्यक उत्कृष्ट खेलाडी उत्पादन गर्नसक्ने सामर्थ्य गुल्मी एक्लैले पनि राख्नसक्ने’ देखाएको र त्यो विश्वास आफूमा रहेको यस क्षेत्रमा खेलकुदको विकासमा सक्रिय क्षेत्रीले बताउनु भयो । तर आवस्यक खेलमैदानको अभावमा खेलाडीहरुमा अभ्यासको कमी हुने भएकोले आफूहरु पछिपर्ने अवस्था सिर्जना हुने गरेको खेलाडीहरुको भनाइ छ । खेलकुदमार्फत जिल्लाको नाम देशविदेशमा राख्न पहिलो खुड्किलोको रुपमा सबैभन्दा पहिले एउटा उत्कृष्ट खेलमैदानको आवस्यकता परेकोले सबैले आर्थिक सहयोग गर्न सम्पूर्ण खेलप्रेमी देश विदेशमा रहनुहुने महानुभावहरुलाई आग्रह गरिएको छ । यसै समाचार मार्फत गाउँपालिका प्रमुख पारिश्वर ढकाल र समस्त निर्वाचित जनप्रतिनिधिहरुको ध्यानाकर्षण पनि गराउन चाहन्छौं ।

Advertisements
Posted in Gulmi News, Many More, Writing/Blogging

जनप्रतिनिधिका आकांक्षीहरु ! सपना होइन न्युनतम आवस्यकता पूरा गरेर बसाइसराइ रोक

चक्र भण्डारी
राष्ट्रिय सहमति जुटाएर दोश्रो चरणमा गर्ने भन्दै सरकारले जेठ ३१ गतेका लागि तोकेको ५ नम्बर प्रदेशसहित १, २ र ७ नम्बर प्रदेशको स्थानीय निकायको चुनावको मिति “असार १४” अझै पनि अन्योलमै छ । सरकारले मधेस केन्द्रित दललाई अझै मनाउन नसकिरहेको भएतापनि यस क्षेत्रको चुनावी सरगर्मी भने निकै बढेको छ ।

चुनावले हाम्रो जिल्ला गुल्मी पनि तातेको छ, माहोल रमाइलो बन्दै छ । जनमतलाई आफ्नो पक्षमा पार्न दलहरुका स्थानीय नेताकार्यकर्ताहरुले बलबुताले भ्याएसम्मको प्रयास गरिरहेका छन् । स्थानीय निकायमा आफ्नो पार्टीको उपस्थितिलाई बलियो बनाउन जिल्लाका केन्द्रियस्तरका नेताहरु पनि अहिले लागिपरिरहेका छन् । दलका नेताकार्यकर्ताहरुले जनताको ध्यान खिच्न राष्ट्रिय मुद्दासंग आफूलाई जोड्ने पनि गरेका छन् । कतिपय दलले ‘आफ्नो पार्टीको सरकारको पालोमा संबिधान जारि भएको’ भन्दै आफूलाई भोट गर्न भनेका छन् त कोहि दलले आफूलाई ‘वृद्दभत्ता सुरु गर्ने दल’ भनेका छन् भने कोहि ‘लोडसेडिङ अन्त्यको जस’ आफूलाई दिँदै भोट मागिरहेका छन् ।

राष्ट्रिय राजनीतिमा कुन पार्टीले के गरे, कुन पार्टीको मुद्दा कस्तो भन्नुले स्थानीय निकायमा कमै फरक पार्छ । कम फरक यस अर्थमा पार्छ कि स्थानीय निकायमा निर्वाचित जनप्रतिनिधिको अधिकार क्षेत्र स्थानीय तह मात्र हो । त्यसैले हरेक मतदाताले दलहरु भन्दा पनि स्थानीय उमेदवारलाई उनीहरुले उठाएका मुद्दा हेरेर अत्यन्त विवेकी भएर आफ्नो मतको प्रयोग गर्नुपर्छ । हाम्रो जस्तो अशिक्षित समाजमा अझैपनि ‘दलहरुका चुनाव चिन्हका गुणका आधारमा’ भोट दिइन्छ अर्थात त्यसरी नै भोट गर्न अशिक्षित दिमागमा मनोवैज्ञानिक प्रभाव पारिन्छ ।

एमालेलाई भोट किन दिने भन्दा ‘सुर्यले उज्यालो दिन्छ त्यसैले’ वा कांग्रेसलाई भोट दिने भनेको ‘रुखले सितल दिने भएर’ …..। सुर्यको उज्यालो र रुखको सितलतासंग उक्त पार्टीले उठाएको उमेद्वारको कुनै सम्बन्ध छ र? तर पनि एक खालको मनोवैज्ञानिक प्रभाव हाम्रा अशिक्षित आमाबुवाको दिमागमा परेको छ । उनीहरु त्यसैका आधारमा मताधिकारको नाममा आफ्नो मतको दुरुपयोग गरिरहेका छन् । प्रत्येक चुनावमा त्यहि मनोविज्ञानका आधारमा नयाँनयाँ अनुहारलाई जिताएका छन् । त्यसैले शिक्षित जमातले पार्टीभन्दा माथि उठेर आफ्नो परिवार र समाजमा राम्रा उमेदवारको पक्षमा जनमत बनाउन मद्दत गरेमा आफ्नो स्थानीय तहको भविष्य उज्यालो हुनेमा दुइमत छैन । त्यस्तै अहिलेको ठूलो र झन्झटिलो मतपत्रमा छाप लगाउने तरिका अर्थात मतदाता शिक्षामा सहयोग गरेमा कम मतपत्र बदर हुनेछन् र सहि उमेदवारको छनोटमा सहयोग पुग्नेछ ।30_big

लामो समयसम्म स्थानीय निकायको निर्वाचन हुन नसक्दा विकासले गति लिन नसकिरहेको अवस्थामा अब निर्वाचित हुने जनप्रतिनिधिबाट जनताको ठूलो अपेक्षा हुनु स्वाभाविक नै हो । स्थानीय उमेदवारले पनि त्यहि अनुरुप आफ्ना घोषणापत्रहरु तयार पनि पारेका छन् । तर कार्यान्वायनका आधार बिनाका सपनामात्रको कुनै अर्थ रहदैन । कतिपय उमेद्वारले आफ्नो क्षेत्राधिकारको ख्याल नगरि आफ्नो अधिकारभन्दा माथिका काम पनि गर्ने भन्दै प्रचारप्रसार गरिरहेका छन् ।

चुनावकै अवसरमा केहि ‘टुरिस्ट नेताहरु’ पार्टीको टिकट बोकेर गाउँ पसेका छन् । ती अवसरबादी नेताहरु जसरी आउँछन त्यसरी नै हराउने गरेको विगतमा पनि देखिएको छ । त्यसैले उमेद्वार छनोटको पहिलो चरण, ‘उमेद्वार स्थानीय तहमा कत्तिको भिजेका छन् अर्थात विगतमा ती उमेद्वारले हाम्रो गाउँसमाजलाई केके योगदान पुर्याएका छन्’ भन्ने जान्नु हो । पहिलेको जस्तो पार्टीको चुनाव चिन्ह मात्र हेरेर भोट दिने अवस्था अहिले छैन, त्यसैले ठुल्ठुला सपना मात्र देखाउनु भन्दा हाम्रो स्थानीय माग र आवस्यकतालाई बुझ्न सकेमा उमेद्वारलाई पनि राम्रो हुनेछ ।

गुल्मी आफैमा त्यति अविकसित जिल्ला पनि होइन । तर दिन प्रतिदिन पहाडबाट तराइ सर्नेको जनलहरले गुल्मीका ग्रामिण बस्तीहरु रित्तिने क्रम जारि छ । त्यसैले पहाडबाट तराइ सर्नेको जनलहर रोक्न स्थानीय निकायका प्रतिनिधिले प्रयास गर्न सक्नुपर्छ । प्रत्येक गाउपालिकामा गुणस्तरीय स्वास्थ्य सेवा, स्वरोजगारका बाटाहरु, उच्च शिक्षा र प्राबिधिक शिक्षासहितका क्याम्पसहरु, सडक सुलभतामा वृद्धि, लगभग शुन्य जस्तै रहेको पर्यटनलाई बिशेस जोड दिएर पर्यटन व्यवसायलाई उकास्ने जस्ता केहि न्युनतम आवस्यकताहरु पूरा गर्न सकेमा बसाइसराइको दरलाई कम गर्न सकिन्थ्यो ।

प्रत्येक क्षेत्रमा बिशेसज्ञ सेवा सहितको कम्तिमा एउटा अस्पताल, प्रत्येक गाउँगाउँमा मोटरबाटो पुर्याउने, खनिसकेका सडकहरुको स्तरोन्नति र कालोपत्रे गर्ने प्रक्रिया अघि बढाउने, अन्तीम स्टेसनका रुपमा रहेका गुल्मीका मुख्य सडकहरुलाई अन्य जिल्लाहरुसम्म जोड्ने, जिल्लाको निर्माणाधीन रेसुङ्गा विमानस्थलको निर्माणलाई छिटो सक्ने र विमानस्थल जोड्ने सडकसंजाल बढाउने, प्रत्येक गाउँमा स्वच्छ खानेपानी र सिंचाईको सुबिधा पुराउने, देशकै कफी खेतिको उद्गमस्थल स्थल भएकैले कफी खेतिलाई बिस्तार गर्दै ‘इलामको चियाबारी जस्तै’ गुल्मीमा पनि ‘कफीबारी’ को रुपमा पर्यटनको विस्तार गर्ने, गुल्मीको अर्गानिक कफीको ‘ब्राण्डिङ’ गरि देश विदेशमा हाम्रो कफीको निर्यातलाई बढाउने, कालिगण्डकी र बडीगाड नदीमा जलपर्यटनको रुपमा विकास गर्ने, कालिगण्डकी करिडोरको निर्माण सम्पन्न भएपछी यसले धेरै सम्भावनाका ढोकाहरु खोल्ने हुँदा यसलाई जोड्ने सडकसंजाल बढाउने, नेपालको चारधाम मध्येको एक रुरु क्षेत्रलाई प्रचारप्रसार गरि अझै व्यवस्थित बनाएर पर्यटन गतिविधि बढाउने, रुरु क्षेत्रमा आउने पर्यटकलाई एउटै प्याकेजमा रुद्राबेनी धाम, रेसुङ्गा, विचित्र गुफा, सालिमे दह, दिब्रुङ, गुल्मी दरबारलगायतका ठाउँहरु घुम्न जाने व्यवस्था मिलाउने, अन्य सम्भावित पर्यटकीयस्थलहरुको विकास र प्रचारप्रसार गर्ने ।

रेसुङ्गा, सालिमेदह लगायत क्षेत्रलाई ट्रेकिंङ रुटको रुपमा विकास गर्ने, र भौतिक संरचनाहरु निर्माण गर्ने । गुल्मीका हरेक सानाठूला नदि तथा खोलाहरुबाट लघु जलविद्युत निकालेर जिल्लालाई विद्युतमा आत्मनिर्भर बनाउने । नयाँ बस्दै गरेका बजारलाई व्यवस्थित गरि एकीकृत बस्तीको रुपमा विकास गर्ने लगायत काम गर्न सकेमा जिल्लाको अवस्था माथि पुग्नेछ । सरकारी क्षेत्रमा सबैभन्दा धेरै नाम निकाल्न सफल जिल्लाको उपमा पाएको हाम्रो गुल्मीले सबैभन्दा धेरै स्वरोजगारका अवसर सृजना गर्ने जिल्लाको रुपमा पनि नाम राख्ने बनाउन नयाँ जनप्रतिनिधि सफल हुन सक्नुपर्छ ।

सत्यवती गाउँपालिका, गुल्मी । 

Posted in Gulmi News, Many More

कुर्घामा थानेश्वरले सांसदलाइ गीतले आँशु खसाल्ने बनाए !

अनिश शर्मा गैरे, प्रकाश घिमिरे, वामी गुल्मी ।।


गीत सँगीतको क्षेत्रमा छुट्टै स्वर सँगै पहिचान भएका बहुचर्चित कलाकार थानेश्वर गौतमले गुल्मीको कुर्घाका स्थानीयहरुलाइ नचाए ।
उनले नेपाली काँग्रेसका केन्द्रिय सदस्य तथा गुल्मी क्षेत्र नम्बर ३ का सासंद चन्द्र भण्डारीलाइ देश प्रेमी गीतद्धारा आशु झार्ने गराए ।
नेता भण्डारी यति सम्म प्रभाबित भएकि उनले आफुले लगाएको माला झिकी थानेश्वरलाइ लगाइदिए ।

थानेश्वर गौतमको प्रस्तुतीले बालक देखी बृद्धबृद्धालाइ अचम्मित बनायो ।


उनको गाजल लगाएनछौ, सालैजो, छमछम छमछम लगायतका गीतहरुले उपस्थितहरुलाइ नचायो भने हरिहर दाहालको रचनामा रहेको देश भक्ति गीत ‘एउटा सपुत जन्मे हुन्थ्यो देशलाइ माथी उठाउने’ भन्ने गीत गाउँदा उपस्थितहरु छातीमा हात राखेर आशु खसाले का थिए । उनीहरु साच्ची नै थानेश्वरको प्रस्तुती बाट अचम्मित भए । स्थानीयहरुले कार्यक्रमलाइ तालीमय बनाएका थिए ।
आज सम्म धेरै गीतसँगीतमा आफ्नो स्वर र सँगीत भरेका गौतमले सँगीत क्षेत्रमा स्नातकोत्तरको पढाइ पनि गरेका छन । उनले गीत सँगीतकै क्षेत्रमा धेरै देशहरु पुग्ने अवसर पनि पाएका छन । उनले लोक गीत, आधुनिक, चलचित्र, रोइला, सालैजो लगायतका गीतहरुमा प्रसिद्धि कमाएका छन । उनी बाग्लुङ्को गल्कोट ज्यामिरेमा जन्मेका सर्जक हुन । उनले भावी दिनहरुमा यस्तै जनताको मन छुने गीतहरु गाउने प्रतिबद्धता ब्यक्त गरे । Source: Anish Gaihre


ताजा अपडेटका लागि फेसबुकटुइटरमा जोडिनुहोस

Posted in Gulmi News, Many More

गुल्मीलाई बिकासमा नमुना जिल्ला बनाउन आफु लागि परिरहेको सांसद भण्डारीको भनाइ

गुल्मीको बिकासको लागि एक अर्ब बजेट छुट्टाएको भनाइ : योजनाहरु यस्ता छन्

अनिश शर्मा गैरे, प्रकाश घिमिरे, वामी गुल्मी ।।
नेपाली काँग्रेसका केन्द्रिय सदस्य तथा गुल्मी क्षेत्र नम्बर २ का सासंद माननीय चन्द्र भण्डारीले जनताले हराएका ब्यक्तिहरुको पछाडी लाग्दा आज देशले दुख पाएको बताउनुभएको छ । आज वामीका बिभिन्न क्षेत्रहरुमा कार्यकर्ता भेटघाटको क्रममा उहाँले केही हारेका ब्यक्तिहरुको मागहरुको कारणले देशमा सबिंधान कार्यान्वयनमा जटिलता थपिएको बताउनुभएको हो । सासंद भण्डारीले सबिंधान कार्यान्वयनमा सघिंयताले जटिलता थपेमा जनमत संङग्रहमा जानुपर्ने बताउनुभयो ।
समाजमा राजनीतिक दलहरुले जनतालाइ बिभाजन गरेको बताउँदै नेता भण्डारीले सानो तह बाट नै नेतृत्व गर्ने ब्यक्तिहरु भ्रष्ट हुँदा देशले जटिल परिस्थिीमा रहनुपर्ने बाध्यता रहेको बताउनुभयो । प्रदेश नम्बर ५ को आन्दोलनको बिषयमा कुरा गर्दे भण्डारीले प्रदेश ५ को बिषयमा कुरा गर्ने अधिकार अन्य प्रदेशका स्थानीयहरुलाइ नभइ यही प्रदेशका जनताहरुको भएको धारणा राख्नुभयो ।
 

बिकास सम्बन्धी बिषयमा बोल्दै सासंद भण्डारीले देशमा नेताहरुले आफु र आफ्नाहरुलाइ मात्र बनाउने काम गरेको बताउँदै गरिब जनताको पक्षको काममा आफु लागेको बताउनुभयो । उहाँले गुल्मी जिल्ला लाइ बिकासको नमुना जिल्ला बनाउनको लागि १ अर्ब बजेट बिनियोजन गराएको बताउनुभयो । उहाँले जनताले जे मागे पनि पुरा गरिदिन आफु तयार रहेको बताउनुभयो ।


बडिगाढ नदीमा डेढ किलोमिटरको दुरीमा पुलहरुको योजना पारेको बताउँदै भण्डारीले अरुले गरेका काममा आफ्नो जश लिन खोज्नेहरु प्रति आफुले भन्दा फरक काम गरेर देखाउन चुनौती दिनुभयो । उहाँले जनतालाइ काम गरेका ब्यक्तिहरुको सम्मान गर्न पनि आग्रह गर्नुभयो । आफुले गरेका काममा अन्य ब्यक्तिहरुले आफ्नो भनेर जस लिन खोजेको प्रति उहाँले जनताहरु आफै सचेत हुनुपर्ने बताउनुभयो । गलत गर्नेलाइ सबैले औला ठड्याउनुपर्ने तथा काम गर्ने ब्यक्तिलाइ सम्मान गर्नूपर्ने उहाँको भनाइ छ ।


सालझण्डी तम्घास सडकखण्ड अब एक दुइ महिनामै तम्घास जोडिने जानकारी दिदै उहाँँले अब बुटवलबाट तम्घास डेढ घण्टा मै आउने सकिने (यस सम्बन्धी समाचारका लागि यहाँ क्लिक गर्नुहोस्) बताउनुभयो । जिल्लाकै सबैभन्दा बढि ब्यस्त सडक रिडी रुद्रबेणी वामीटक्सार सडक खण्डको काम पनि धमाधम भइरहेको बताउँदै उहाँले ठेकेदारले काम गरेर नभ्याएसम्म आफु बजेटमा कमी हुन नदिने बताउनुभएको छ ।

पुर्तिघाट देखी पर्वत जोड्ने पुलको निर्माणको लागि १५ देखी २० करोड बजेट आफुले बिनियोजन गरेको बताउँदै उहाँले गुल्मीलाइ बिकासमा नमुना बनाउन आफु हदैसम्म लागेको भनाइ राख्नुभयो ।


सासंद भण्डारीले वामी १ बसेरी, वामी ७ सनकौल, वामी ७ ठुलाखर्क, वामी ७ पुरानागाँउ, वामी ८ मालारानी, वामी ४ मैदान, वामी टक्सार लगायतका क्षेत्रमा कार्यकता भेटघाट गर्नुभएको छ ।


कार्यक्रमका अवसरमा स्थानीयहरुले आफ्नो मागहरु प्रस्तुत गरेका थिए । सासंद भण्डारीले वामी ७ सनकौलमा रहेको जनताको आफनै लगानीको पावरहावसलाइ १५ लाख, वामी १ बसेरी रुक्से हुँदै अर्लाङ्कोट तथा काँडेबास पुग्ने सडकको लागि रु १ करोड र यसलाइ डिपिआरमा परेमा करोडौ बजेट उपलब्ध गराउने बताउनुभयो । 

त्यसैगरी वामी ७ ठुलाखर्कमा रहेको ठुलाखर्क प्राबिमा कम्प्युटर, फर्निचरका सामग्रीहरु, वामी ७ पुरानागाँउमा रहेको सहिद सम्शेर प्राबिको लागि १५ लाख बराबरको ब्यबस्थाकीय सामग्रीहरु प्रदान गर्ने घोषणा गर्नुभएको छ । साथै बिभिन्न वडाहरुमा खेलकुदका सामग्री तथा खेल मैदानको ब्यबस्थापन गरिदिने आश्वसान समेत दिनुभएको छ । वामी मैदानमा रहेको शारदा बिद्या मन्दिर माबिको अवलोकन गर्दे बिद्यालयलाइ आबश्यक रकम उपलब्ध गराउने, वामी ४ भलेकामा रहेको खड्कदेबी प्राबिलाइ कम्प्युटर तथा तारबारको लागि ब्यबस्थापन गरिदिने, मालारानी प्राबिमा पनि कम्प्युटर तथा कम्पाउण्डको लागि पहल गर्ने बताउनुभयो । कार्यक्रमकै अवसरमा वामीका समाजसेवी तथा हाल अमेरीकामा रहनुभएको नेपाली काँग्रेका नेता तथा जिबिसका पुर्ब सदस्य हरि नारायाण सापकोटाले खड्कदेबी प्राबि वामी ४ मा रहेका बिद्यार्थीहरुलाइ दिवा खाजाको लागि प्रति बर्ष १५ हजारका दरले दुइ बर्ष सम्म उपलब्ध गराउने र आगामी बर्षको लागि अन्य पहलरु गराउने बताउनुभयो । साथै सापकोटा ले नै वामी ७ पुरानागाँउमा रहेको सहिद सम्शेर प्राबिका बिद्यार्थीहरुलाई दिवा खाजाको लागि १५ हजार रुपैया उपलब्ध गराउनुभयो ।


यस्तै सांसद भण्डारीले वामी बजारबाट शालीमे दह सम्म जोड्ने बाटो, वामी मालारानीको बाटो तथा अन्य सडकलाइ पनि १ करोड रकम बिनियोजन गरेको बताउनुभयो । त्यसैगरी वामी मैदान, ठुलाखर्क तथा अर्लाङ्गोट पुग्ने सडकको लागि एक करोड ब्यबस्था गरेको बताउनुभयो । अन्य धेरै सडक तथा जनताका आबश्यक बिकासका कामहरुलाइ आबश्यक बजेट उपलब्ध गराउने बताउनुभयो ।


वामी जिल्लाकै सुरक्षित क्षेत्र भएको हुनाले यस क्षेत्रमा एकिकृत बस्ती बसाउन सकिने र यस क्षेत्रमा रिँगरोड तथा कभर्डहलको लागि पनि आफु प्रयासमा रहने बताउनुभयो ।


यसैबिच कार्यक्रमको अवसरमा बडागाँउ बाट १२ जना तथा वामी बाट १६ जना अन्य पार्टी परित्याग गरी काँग्रेसमा प्रबेश गरेका छन ।
नव प्रबेशीहरुलाइ सासंद भण्डारीले फुल मालाले स्वागत गर्नुभएको थियो ।
कार्यक्रममा नेपाली काँग्रेस वामीका सभापति सुदर्शन शाक्यको अध्यक्षता रहेको थियो भने कार्य समितिका पदाधिकारीहरु, क्रियाशिल सदस्य, स्थानीय बासिन्दा लगायतको उपस्थिती रुहेको थियो ।

News Source: Anish Gaihre


ताजा अपडेटका लागि फेसबुकटुइटरमा जोडिनुहोस

Posted in Gulmi News, Many More

गुल्मीमा १४ वटा स्वाथ्य चौकीको भवन बन्दै

तम्घास (गुल्मी), २५ माघ । स्वास्थ्यमन्त्री गगन थापाले अबको पाँच वर्षमा कुनै पनि स्थानमा स्वास्थ्य चौकी र अस्पतालका भवन खोज्दै जानु नपर्ने बताएका छन् ।

भवन निर्माणका लागि राज्यसँग स्रोतको कमी नभए बताए । मङ्गलबार गुल्मीको हस्तिचौर गाविसस्थित स्वास्थ्यचौकीको भवन शिलान्यास गर्दै मन्त्री थापाले उक्त कुरा बताए ।

“देशभरका स्वास्थ्य चौकी र अस्पतालका भवन बनाउन करिब रु ६० अर्ब लाग्ने रहेछ त्यसको लागि प्रक्रिया सुरु भएकाले अबको पाँच वर्षमा कुनै भवन बन्न बाँकी रहँदैन”–थापाले भने ।

“देशभर बन्नुपर्ने स्वास्थ्य चौकी भवन दुई हजार ५०० छन्, यसवर्ष एक हजार २०० प्रस्ताव भएका थिए, तीमध्ये २७५ यो वर्ष परेका छन्”–उनले भने, “२७५ मध्ये गुल्मीमा मात्र १४ वटा भवन परेको छ ।”

शिलान्यास कार्यक्रममा गाविस सचिव तथा स्वास्थ्य चौकी व्यवस्थापन समितिका अध्यक्ष नरबहादुर अर्यालले स्वास्थ्य चौकीको लागि एम्बुलेन्स, स्वास्थ्य सामग्री र दरबन्दीअनुसारका कर्मचारीको माग गरे।

अत्यन्तै जीर्ण रहेको हस्तीचौर स्वास्थ चौकीको भवन रु साँढे दुई करोडको लागतमा निर्माण सुरु गरिएको छ । भवन आगामी पुसभित्र सम्पन्न गर्ने लक्ष्य लिइएको छ । रासस

Posted in Gulmi News, Many More, Writing/Blogging

पाँच नम्बरको आक्रोश किन????

पाँच नम्बर प्रदेशबाट पहाडी जिल्ला हटाउन खोजिएको बारे हामी पाँच नम्बरवासी किन गम्भीर असहमति जनाएका छौँ?

nepal3
१. सकेसम्म हिमाल, पहाड, तराई सँगसँगै भएका प्रदेश बनेमा हामीबीचमा रहिआएको सम्बन्ध अझै मजबुत बन्दै समानुपातिक बिकासमा टेवा पुग्नेछ। त्यो गर्न नसके पनि कम्तीमा पहाडी जिल्लालाई तराईबाट नछुट्टाउ।
२. गुल्मी, पाल्पा, अर्घाखाँची, प्युठान, रोल्पा जस्ता पहाडी जिल्लाको ब्यापारिक केन्द्र नै बुटवल हो, यदि यो छुट्टिएमा पहाडी जिल्लाले प्रत्येक सामान किन्दै गर्दा कर तिर्नुपर्ने हुन्छ। किनकि राज्यले निर्यातबाट उठाएको कर नै आफ्नो मुख्य आम्दानीको स्रोत बनाउनेछन्।
३. बुटवल उपमहानगरपालिका गुल्मी, पाल्पा, अर्घाखाँचीबाट झरेकाहरुले मात्र बनेको शहर हो, त्यसैले उनीहरूको हरेक सम्बन्ध तिनै जिल्लाहरुसँग रहेको छ। एउटै cluster मा मिलेर बसिरहेका जनताहरुलाई आतंकित बनाएर छुट्टाउन खोजिदैछ, यसमा हामी प्रत्येक प्रदेशवासी सचेत छौं।
४. प्रस्तुत पहाडी जिल्लाहरुको पोखरासँग “घुम्न जाने” बाहेक कुनै खालको सम्बन्ध छैन।
५. प्रस्तुत पाँच नम्बर प्रदेशमा कुनै खालको बिरोध पनि थिएन, सिमित केन्द्रिय नेताहरुको स्वार्थ बाहेक कसैको पनि छुट्टिनुपर्ने माग थिएन।
६. प्रस्तावित संसोधनको बिरोधमा स्वतस्फूर्त रुपमा कुनै पार्टीको झण्डा बिना नै निस्केको जनलहरले पनि यहीँ देखाउछ कि यहाँका जनता छुट्टिन चाहदैनन्। यत्तिका ठुलो जनलहर, त्यस क्षेत्रका सबै सांसद तथा नेताको गम्भीर बिरोधका बाबजुद पनि कसैको इसारामा ल्याइएको संसोधन प्रस्ताव हामीलाई मान्य हुनेछैन।
७. बिश्व शान्तिको केन्द्र लुम्बिनीलाई निल्ने दीर्घकालीन योजना अनुरुप यसो भएको हुनसक्ने आशंका पनि कतैकतै गरिएको छ। त्यसतर्फ प्रत्येक नेपाली नागरिक सचेत हुनु जरुरी छ।

भिडियो: ५ नम्बर प्रदेशबाट पहाडी जिल्ला हटाउन खोजिएकोमा वुटवलमा स्वतस्फुर्त रुपमा विरोध प्रदर्शनमा उत्रेको जनलहर

 

ताजा अपडेटका लागि फेसबुकटुइटरमा जोडिनुहोस

Posted in Gulmi News, Many More, Travel, Writing/Blogging

कालिगण्डकी करिडोर; समृद्धिको बाटो बन्दै

घनश्याम गौतम, तम्घास, नेपाल म्यागेजिन
अर्बेनी–७, गुल्मीका भीमलाल न्यौपाने, ७२, लाई अहिले सदरमुकाम तम्घास आउन स्याङ्जा–पाल्पा हुँदै दुई जिल्ला घुम्नुपर्दैन । आफ्नै दैलोअगाडि गाडी चढेर चार घन्टामै सदरमुकाम पुग्छन् । उनी भन्छन्, “बाँदर लड्ने भीरको बाटो पैदल हिँडेर तम्घास पुग्नुपथ्र्यो । यति छिटो देखिएको यो परिवर्तन कहिलेकाहीँ त सपनाझैँ लाग्छ ।”

तम्घासबाट करिब ८० किलोमिटर पूर्वमा रहेका हर्मिचौर, अर्बेनी, जयखानी, पूर्तिघाट, खड्गकोटजस्ता एक दर्जनभन्दा बढी गाविसलाई कालीगण्डकी करिडोरले सुगम बनाइदिएको छ । करिडोरको गुल्मीको रिडीदेखि पूर्तिघाटसम्मको ट्रयाक खुलेपछि यस क्षेत्रका गुल्मी, स्याङ्जा, पर्वत र बाग्लुङका बासिन्दाको दैनिकी र जीविका नै फेरिँदै छ । गुल्मी खण्डको ४५ किलोमिटरको ट्रयाकमा अहिले साना–ठूला सवारी साधन चल्न थालेका छन् । यो खण्ड बाग्लुङको सिमाना खड्गकोटको बरल्वासम्म जोडिन्छ ।

लामो समय अल्झिएको यो खण्डको काम करिब ५० करोड रुपियाँ खर्चेर नेपाली सेनाले सकेको हो । ०३९ देखि नै ट्रयाक खोल्ने प्रयास सुरु गरिएको थियो । ०५७ मा हर्मिचौरमा कालीगण्डकी करिडोरको शिलान्यास भएपछि यसले तीव्रता पाउने अपेक्षा गरिएको थियो । तर, विभिन्न बहानामा काम ढिलो भयो र अन्तत: तीन वर्षअघि नेपाली सेनालाई जिम्मा दिइयो । करिडोर निर्माण कार्यदलका प्रमुख सेनानी रेश्मीराज भट्टराई भन्छन्, “३४ वर्षदेखि अलमलमा परेको ट्रयाक हामीले ३ वर्षमै खोल्न सफल भयौँ ।”

कालीगण्डकी करिडोरका रूपमा काम सुरु हुनुपूर्व नै सरकारले व्यापारिक पारवहन मार्गका रूपमा देशभर आठवटा उत्तर–दक्षिण करिडोरको परिकल्पना गरेको थियो । मुस्ताङको कोरलाबाट बेनी, कुस्मा, मिर्मी, पाल्पा हुँदै रुपन्देहीको बेलहिया जोड्ने योजना थियो । पछि कालीगण्डकी करिडोर योजना अगाडि सारिएपछि राम्दी पुल, गुल्मीबाट कालीगण्डकी किनारैकिनार नवलपरासीतर्फ काम सुरु भयो भने पाल्पा–बुटवल खण्डमा थप काम हुन पाएन । “उत्तर–दक्षिण व्यापार मार्गका रूपमा गैँडाकोट पुग्नुभन्दा पाल्पा हुँदै बुटवल झरेर भारतको सुनौली पुग्नु धेरै छोटो पर्छ,” सडक विभागका सहसचिव गोपाल सिग्देल भन्छन्, “तर, गैँडाकोटसम्मको १ सय ३० किलोमिटर सडकले नदी किनारका फाँट र दुर्गम गाउँहरूलाई दिने पहुँचलाई नजरअन्दाज गर्न मिल्दैन ।”

गुल्मी खण्डमा ट्रयाक खोल्ने काम सकेर अहिले सेनाले बाग्लुङको छिस्तीदेखि टुटुंगासम्मको २६ किलोमिटर खण्डमा काम गरिरहेको छ । टुटुंगादेखि बाग्लुङको बलेवा विमानस्थल हुँदै मालढुंगासम्मको १४ किलोमिटर ट्रयाक यसअघि नै खोलिसकिएको छ । “२६ किलोमिटरको काम पूरा भएपछि गुल्मीको रिडीदेखि मुस्ताङसम्म सजिलै पुग्न सकिन्छ,” प्रमुख सेनानी भट्टराई भन्छन् ।

 contact for perofessional web development

भारतको सुनौली नाकादेखि चीन जोड्ने मुस्ताङको कोरला नाका जोड्ने उद्देश्यले सुरु गरिएको उत्तर–दक्षिण व्यापारिक पारवहन मार्ग कालीगण्डकी करिडोर ४ सय ३५ किलोमिटर लामो छ । २२ अर्ब रुपियाँ लागत अनुमान गर्दै सरकारले तेस्रो राष्ट्रिय प्राथमिकताको आयोजनामा राखेर ०५९ देखि निर्माण सुरु गरेको थियो । त्यतिखेर २० वर्षभित्र सम्पन्न गर्ने सरकारको लक्ष्य थियो । योजना अनुसार आगामी पाँच वर्षभित्र करिडोरको जोमसोम–कोरला खण्डमा ग्राभेल र बाँकीमा पिच सम्पन्न हुँदै छ । “गरिबी निवारण, दिगो आर्थिक विकास र विकेन्द्रीकरणमा सहयोग पुर्‍याउने सडकको अवधारणा हो,” करिडोर सरोकार समितिका प्रवक्ता टीकाराम ढकाल भन्छन्, “पाल्पा खण्डको काम अझै बाँकी रहँदा करिडोर पूर्ण हुन सकेको छैन । र, काम नसकी उद्देश्य पूरा गर्न सकिँदैन ।”


यो करिडोर सम्पन्न भएपछि पश्चिमाञ्चल विकास क्षेत्रका ६ जिल्लाका दुर्गम भेगमा यातायात जोडेर तिनलाई सुगम मात्र बनाउने छैन, हिमालदेखि पहाड र तराई हुँदै व्यापार विस्तारसमेत गर्ने अपेक्षा गरिएको छ । नवलपरासीको गैँडाकोटदेखि पाल्पाको राम्दी, पीपलडाँडासम्मको १ सय ३० किलोमिटर खण्डमा ट्रयाक खुलिसकेको छ । पाल्पाको राम्दीदेखि अर्गलीसम्मको ३३ किलोमिटर खण्डमध्ये तीन सय मिटरमा मात्र ट्रयाक खुल्न बाँकी छ, जसमा काम सुरु भइसकेको छ । यो आर्थिक वर्षमै बेलहियादेखि कोरलासम्म ट्रयाक जोडिएपछि स्तरोन्नतिको काम हुने अधिकारीहरू बताउँछन् ।

Kaligandaki-Koridor-10022017082705-1000x0

हिमालदेखि भारतको त्रिवेणीसम्म नुन बोक्ने प्राचीन रेशम मार्गमा यो करिडोर निर्माण भइरहेकाले यसले ऐतिहासिक महत्त्व राख्ने करिडोर निर्माणका अगुवा एवं पूर्वमन्त्री प्रदीप ज्ञवाली बताउँछन् । भन्छन्, “हिन्दुहरूको पवित्र तीर्थस्थल मुक्तिनाथ धाम र बौद्ध धर्मावलम्बीको धार्मिक स्थल लुम्बिनीलाई पनि सीधा जोड्ने एउटै मार्ग हुनु नै पनि यसको एउटा महत्त्वपूर्ण पक्ष हो ।” प्राचीन र धार्मिक महत्त्वसँगै करिडोर निर्माणले तीन अञ्चल र ६ जिल्लाका १० लाख ३० हजार जनसंख्यालाई सीधा सडक सञ्जालमा जोड्नेछ । अहिले निर्माण भइरहेको सडकको चौडाइ साढे सात मिटर छ । कालीगण्डकी तटीय क्षेत्र हुँदै निर्माण भइरहेकाले कृषिजन्य उत्पादन, पर्यटन विकास, विद्युत् उत्पादन, उद्योग स्थापनामा समेत यो करिडोरले योगदान गर्ने आशा गरिएको छ ।

सरोकार समितिका प्रवक्ता ढकाल भन्छन्, “हिमालको काखबाट बग्दै आएको कालीगण्डकीको तटीय क्षेत्रको प्राकृतिक सौन्दर्य, झरना र धार्मिक सम्पदा, सांस्कृतिक पर्यटनको प्रचार–प्रसार र विकासमा समेत करिडोरले महत्त्व राख्नेछ ।”

यो पनि पढ्नुहोस्

ताजा अपडेटका लागि फेसबुकटुइटरमा जोडिनुहोस